Hukse šaldi gaskka sápmelaččaid ja politiijaid

Les saken på norsk

– Stuorámus ágga manne válljejin šaddat politiijan lei go váilot sámegielat politiijat. Mun lean ieš Guovdageainnus eret, ja mii diehtit ahte luohttámuš gaskal sápmelaččaid ja eiseválddit lea uhcci. Go gávdno sámegielat politiija gii sáhttá veahkehit go dárbbaša, sáhttá dagahit ahte luohttámuš stuorru. Soaitán šaddat šaldehuksejeaddji, go lean sihke sápmelaš ja barggan politiijan.

Elle gearggai politiijaallaskuvllas 2022. Son studerii Ušluš, ja čađahii práksisjagi Romssas. Ovdal go álggii bargat Guovdageidnui, barggai son Ráissas, Romssa suohkanis.

Vaikko Elle ii leat guhka bargan Guovdageainnus, sávvá son ahte luohttámuš politiijaide lea sturron ja ahte báikkálašolbmot leat duhtavaččat politiijaiguin. Lassá váldit oktavuođa politiijaiguin soaitá šaddan veaháš uhcit, muitala son.

– Soaitá álkibut váldit oktavuođa go deaivvat muhtima gii ipmirda kultuvrra, servodaga, historjjá, geografiija ja máhttá giela.

Lagabut báikegotti

Elle meidne ahte lagasvuohta báikegoddái dagaha earenoamážin bargat politiijan Finnmárkkus.

– Šattat hui oidnosii. Stuorát gávpogiin leat eambbo anonyma. Lea maid earálágan lagasvuohta gili ássiide, ja orro álkibut dainna lágiin hukset luohttámuša. Olbmot oahpásmuvvet duinna ja olbmot dovdet du. Dat lea buoremus oassi bargat Guovdageainnus ja Ráissas. Don suige beasat dáhkkát ja bargat eambbo olbmuid váras, go stuorát báikkiin.

Ii leat hirpmástuhtti ahte politiija bargobeaivi lea oalle molsašuddi. Sii geat barget unnibut báikkiin, barget dan maid gohčodit "kombitjeneste", čilge Elle.

– Dalle bargá buot – sihke patrulje, eastadeaddji ja dutkan bargguid. Muhto boahtá dieđusge das makkár dárbbut leat, ja leat go vuoruhuvvon barggut. Mii dutkat ollu ja bargat iešguđet ráŋggáštanáššiiguin. Muhto mii galledit maid skuvllaid ja mánáidgárddiid, ja logaldallat, dadjá son ja lasiha:

– Mii gieđahallat ollu iešguđet áššiid. Muhtomin soaitá akto dilálašvuođain vaikko ii leat ollu bargohárjáneapmi. Ii leat álo veahkki ja ráđđeaddin oažžumis, ja dalle ferte akto birget. Dat dagaha ahte oahppá ollu ja šaddá ceakkus oahppogeavlla. Don ovdánat máŋgga ládje.

Lea go dus tipsa sidjiide geat veardidit ohccát politiijaohppui dahje juo leat studeanttat?

– Beare geahččal ja duostta boastut bargat. Lea buoret skuvllas bargat boastut go barggus. Ja oza práksissaji eará báikái gos orut dahje leat eret.